Zer da Argo

Ahozko inprobisazio kantatuaren web txokoa da Argo proiektua. Mundu berezi hau osatu, eragin eta ikertzen duten harreman eta informazio trukaketarako gunea izateko asmoz jaio da.

Ahozko inprobisazio kantatuaren inguruan dauden aditu eta inprobisatzaileek sortzen dituzten ikerketa, azterketa, bilketa eta beste zenbait lanen, gai honetan lanean diharduten organismoen, eta munduan zehar antolatzen diren jardunaldi eta ekitaldien inguruko informazioa bildu eta zabalduko duen datu basea da, oinarrian, Argo proiektua.

Bertsozale Elkarteak 2003ko udazkenean antolatutako Ahozko Inprobisazioa Munduan jardunaldietako aurrera begirako proposamenetan aurkeztu da proiektua. Ahozko inprobisazioaren egoera aztertzearekin batera, aurrera begirako proiektu eta plantemenduei erantzuteko helburua du.

Gaur egungo aurkezpen hau hasiera bat besterik ez da; Argo proiektu erraldoi eta zabala denez, denborarekin garatzen joatea da helburua. Ahozko inprobisazio kantatuaren inguruan interesa duten guztien parte hartzea ezinbestekoa izango da aurrera egin nahi bada, eta informazioz hornitzea eta aurrera begira interesgarritzat jotzen diren aholku eta iradokizunak ezinbestekoak izango dira.

Oraingoz, proposamen gisa datu gutxi batzuk sartuta, aurrera begira Argo proiektua izango denaren oinarri teknologikoa definitu besterik ez da egin. Proiektu honen eztabaida zabalago baten hasiera besterik ez du izan nahi Argok.